Зекет – бар жақсылықтың бастауы
Адамның айналасына жақсылық жасай алуы – сауабы мол іс саналатыны жасырын емес. Ізгілік пен мейірімділікке үндейтін ислам дінінде зекет беру – мұсылманның бес парызының бірі ретінде қарастырылған. Негізінен, мұсылмандықтың төртінші шартын орындаудың өзіндік мәні бар. Мәселен, қоғам өміріндегі мұқтаж жандарға берілетін міндетті садақаны зекет деп атайды.Қасиетті Рамазан айында зекет парызын орындайтын жандар көптеп кездеседі. Жақсылық амалды жасайтын мұсылман қауым өзіндегі барды адамдарға үйлестіріп береді. Қайырымды жандардың ізгілікке толы ісінде мұсылманшылдықтың негізгі белгілері көрініс табады. Зекет берген бай-қуатты жандар барынша рухани тұрғыдан тазаруға мүмкіндік алады. Асылында, зекет берудің өзіндік мөлшері қалыптасқан. Ал зекетке берілетін дүние қатарына алтын-күміс, төрт түлік мал, ақша, сауда-саттық тауары жатқызылады. Анығын айтқанда, зекетке толатын мөлшерді «нисап» ретінде атаған екен. Әрине, «нисап» жасауға ұмтылатын жандар Алла Тағаланың мейірім-шапағатына бөленетіне кәміл сенеміз.
– Қайырымдылыққа ұмтылған жамағат зекеттің басты шарттарын білгені абзал. Жұртшылық зекетті 8 түрлі кісіге берілетіндігін қаперінде сақта дейміз. Қарызын төлеуге шамасы келмейтін кісілерге, кедейлерге, міскіндерге, үйіне жете алмай жолда қалған кісі секілді бірнеше тармаққа бөлінеді. Асыл дінімізде зекет берудің адамға тигізер пайдасы көрсетілген. Зекеттен туындайтын ғибадатқа Алла Тағаланың берген байлық нығметіне шүкірлік қылу саналады. Қайырымдылыққа себепкер болған адам әрқашан қолындағы байлықтың Алла Тағала тарапынан берілген жақсылық екенін түсіне алғаны ғибрат. Аталған амалды жасау арқылы қоғамдағы ұрлық, алдау, адам тонау, кісі өлтіру сияқты жаман әдеттен арыла аламыз. Сонымен бірге зекет ауру-сырқаудан, пәле-жаладан, апаттан, байлықтың құрып кетуінен сақтайды, – дейді аудандық мұсылмандар мешіттің бас имамы Асхат Асқарұлы.
Бірде ардақты Пайғамбарымыздың (с.ғ.с.) отбасы қой сойып, оның етін садақа ретінде таратады. Сол кезде Алла елшісі (с.ғ.с.): «Қойдың қанша бөлігі қалды?» – деп сұрағанда, Айша анамыз (Алла оған разы болсын): «Қойдың бір қолынан басқа ештеңе қалмады», – деп жауап береді. Сонда ардақты Пайғамбарымыз (с.ғ.с.): «Қойдың бір қолынан басқасының бәрі бізге қалды»,– деп айтсайшы деген сөзін арнаған. Осылайша берілген садақаның зая кетпей, керісінше өздеріне сауап болып жазылатындығын өсиет еткен. Сондықтан адам баласының берген зекеті мен садақасының міндетті түрде еселенген қайырымы болады.
Балтабай ОРДАБЕКОВ
